السلام عليكم ورحمة الله ، أدخل في الموضوع علطول.
لو حبيا نعمل مقارنة بين المنتديات والمدونات، هنلاقي ان المنتديات تفضل المدونات في حاجات قوية جدا .
منها
- اعداد القارئين للموضوع كثيرا مايزيد وخاصة إن كان المنتدى يزوره أعداد كبيره.
- وكذلك قدم المواضيع في المنتديات قد تفتح للنقاش رغم مرور أعوام أما معظم المدونات ينسى أرشيفها.
- ويزيد على ذلك كون المنتديات تقبل اضافة مواضيع متعددة في اليوم الواحد بخلاف المدونة التى تحتاج لوقت حتى يقرأ زملائك الموضوع.
بصراحة المنتديات ليا فوائد عظيمة جداً ودول اللى خطروا على بالى ومش عايز أستطرد في الفوائد.
أنا كنت سمعت ناس من حبايبنا بيفكروا يقفلوا منتدى شرقاوي وقول أحدهم عليه "غرزة" وكان لي رأي في احدى الأيام أن مايحدث على ساحة شرقاوي من مخالفات للشرع تمنعنا من أن ندعوا إليه او فقط نعلن عنه في مدرجاتنا؛ "فلا يجوز أن ندعوا لباطل".
أنا أول لما دخلت اعدادي عرفت شرقاوي وشاركت في المنتدى بصورة كويسة وكنت أشارك بإسم "وا اسلاماه" واتعرفت على ناس أكبر مني من خلال المنتدى وكانت ناس كويسة جداً.
كنت باحترم أرائهم وكنا بنفتح مواضيع نقاشية في قضايا مهمة يحتاجها كثييييير من أبناء الدعوة ووصلني كثير من المفاهيم عن طريق هذا المنتدى.
أنا اعرف ناس دلوقتي من كبار المدونين ومنهم في الصحافة العالمية كانت بدايتهم "مراسل تحت التمرين" في شرقاوي أون لاين، ولعلكم تعرفونهم جيداً بس انا مش عايز أذكر أسماء.
مر شرقاوي اللى معظمنا خرجنا منه بفترات اختراق وفترات تغيير قواعد بيانات وفترات أفقدته أعضاؤه اللى هوا في الأساس معمول عشانهم، ودخل عليه ناس كتير مبقاش هدفهم إلا التعارف على الجنس الأخر وفتح حوارات وشات وشوفت بعيني في احدى مواضيع الكليات رسائل غرامية يتبادلها أولاد مع بنات في صورة شات.
بجد أنا نفسي منتدى شرقاوي يرجع زي زمان ومش هيرجع إلا لما ناخد بإيدين بعض ونشارك في المنتدى بفاعلية مع بعض.
للأسف دلوقتي ممكن تحط موضوع هادف وقل من يقرأه بخلاف موضوع هايف يقرأه الكثير ويتفاعلون معه، وانا مبقولش ان كل أعضاء شرقاوي اليوم وحشين لا طبعا بس شرقاوي اليوم لا يمثل الواجهة المشرفة لأصحابه ولم يعد ممثل لأبناء الدعوة بالجامعة .
طبعاً مش عايزين نعلق الشماعة على الإدارة لأن الإدارة دورها رقابي أكثر أما المشاركات وصبغ المنتدى بالصبغة الإسلامية ده دورنا احنا وربنا هيحاسبنا عليه.
أسف انى طولت عليكم لكن في الأخر انا أقترح تكوين رابطة قوية لها اسم وشعار وأهداف واجتماعات دورية على الإنترنت تتابع جيداً المنتدى وتشارك بجدية.
انا بجد مستعد وزي ماقولت مش عايز أكون لوحدي ، ياترى مين ممكن يكون معايا؟، ومن عنده اقتاح أفضل؟ ، ومين شايف ان الموضوع من اساسه ملوش لازمة؟ ..... منتظر تعليقاتكم.