امتى تعرف انك في هندسة ؟؟
لما تدخل المحاضرة تلاقي نفسك مش فاهم حاجه في أي حاجه، ومش عارف تعمل ايه عشان تفهم ومستنى المعيدين ينزلوا ورق للطلبة، والورق مينزلش غير على الميد تيرم يبقى انت في هندسة .
لما تلاقي نفسك حابب المواد حب شديد وفي نفس الوقت بتخاف منها جداً ، اعرف انك في هندسة.
لما تحس انك قفلت المنهج وميعديش دقيقة ويتغير شعورك الى انك متعرفش حاجه في المنهج ، ساعتها أكيد هندسة.
لما تعوز تجيب امتياز في مادة وتكون خايف تشيلها.
لما تدخل الامتحان ، تمسك الورقة تتفرج عليها وتقعد تضحك ومش عارف تكتب اي حاجة.
لما تدخل الإمتحان وتلاقيه تحت مستوى الطالب المتوسط وتحل فيه أفضل حل، وتتفاجئ أنك معديتش درجة النجاح.
لما تلاقي الدكاترة بتفرد عضلاتها عليك، وعايزة تحسسك انها فاهمة أكتر منك، وانك طول عمرك طريقتك غلط في التعليم.
لما تطلع من الإمتحان وانت مش عارف هتجيب امتياز ولا مقبول !!
ساعتها ممكن انا أجاوبك ... انت أكيد في هندسة ، وغالباً قسم كهرباء ، ومش بعيد تكون تالتة اتصالات سكشن 5 رقم 10 .......... ادعولي يا جماعة.
11 Comments:
غريبه!!!نفس الاحساس والله.
وآدى القسم اللى كنت ناويه عليه
مشمحتاجه غير واحد كمان يتكلم على باور ومشاكله
عشان ابقى ضمنت التحويل لمدنى.
ربنا يوفقكم لما فيه الخير ان شاء الله
دمتم بخير
لالا يابشمهندسة متفهميش كلامي غلط، اتصالات قسم جميل جدا، انا في المقال بتكلم عن هندسة عامة بس أخر سطر حاطته عشان محدش يقوللى اتكلم عن نفسك D:
وثم كلها سنتين اعتبريهم معلقة دواء وبعد كده تشتغلى في المجال اللي تحبيه
----------------------------
جزاكم الله خيراً على المرور
الحمد لله اني ما دخلتش هندسة ..
(:
تقبل الله منا ومنكم
الأخت ذات النطاقين ، لو كنتي دخلتي هندسة كان زمانك قطعتيهم :D
-----------------------------
جزاكم الله خيرا على المرور
هندسه!!آه
ربنا معاكوا وتنجحكوا يارب وتفهموا كل حاجه وأهى ماشيه..ماشيه وبتعدى..!
بس أنا دخلت أدبى مخصوص عشان مبحبش الجبر بس كنت بحب الهندسه والعلوم (أحيانا).
وفقق الله
وجزاكم الله خيرا
سبحان الله
هم كل بتوع هندسة حالتهم كده
ربنا يوفقكم
كل عام وحضرتك بخير يافندم
دا حال أي واحد في أي كلية في مصر أنا عن نفسي كدا دا نظام تعليم للأذكياء فقط اللى هما مش احنا المهم اذيك يا بشمهندس
حفيدة البنا، على رأيك ماشية وبتعدي ، للأسف دلوقتي معادش فيه جبر وهندسة دخلو في بعض :D ، بقى فيه رياضه تلاتة ورياضة اربعه وحاجات غريبة
--------------
مشكورة على المرور
الأخت ألاء، وحضرتك بخير يافندم.
الموضوع ده عشان الغلابة اللى معايا في هندسة برضه أهاليهم في البيت متلومهومش.
أخي أنس (اخواني وبحب بلادي) نعم معاك في الحتة دي، بس احنا أذكياء بدليل انك في طب وانا بتكلم عن النس في هندسة يعني كليتين قمة، لو مش أذكياء أمال مين هيبقى ذكي ؟؟؟
أنا أتوقع اللى انت تقصده أننا متعلمناش من صغرنا اننا نفكر في غاية الشيء واتعلمنا اننا نتلقاها، فلما حبوا يعلمونا صح لقيونا مش نافعيين.
وكده يبقى احنا دخلنا نفسنا في دوامة ان الوزارتين التعليم العالى والتربية والتعليم منفصلتين وفي فرق بين مرتبات كلا العاملين مما يخلق الفرق في الاستعداد للعطاء والبذل، وبالتالي ينعكس على طريقة التعليم فينعكس على الطالب فالمجتمع و ........ ويبقى الاسلام هو الحل
----------------------
جزاكم الله خيرا على المرور
Post a Comment